Diweddariad polisi

DATBLYGIADAU POLISI YN RHANNAU ERAILL O’R DU

PRYDAIN FAWR

LHA isel yn bwrw rhentwyr Cymru galetaf

Mae gan gyfran fwy o rentwyr preifat yng Nghymru ddiffyg rhwng eu rhent a’u Lwfans Tai Lleol (LHA) nag unrhyw ran arall o’r DU, yn ôl Adolygiad Tai’r DU 2026.

Adferwyd cyfraddau LHA i’r 30^fed ganradd o renti lleol ddiwethaf ym mis Ebrill 2024 ond fe’u rhewyd eto yn Ebrill 2025 ac Ebrill 2026. Bydd y diffyg yn cynyddu’n anochel wrth i renti godi.

Dengys ffigurau a gyhoeddwyd yn Adolygiad Tai’r DU bod gan 63 y cant o hawlwyr yng Nghymru ddiffyg yn 2025, o’i gymharu â 52.1 y cant yn Lloegr a 39.9 y cant yn yr Alban. Roedd y gyfran a oedd yn wynebu diffyg yng Nghymru hefyd yn uwch nag mewn unrhyw ranbarth yn Lloegr.

CYMRU A LLOEGR

Mesur drafft â chynlluniau i ddod â phrydles i ben

Yn yr hyn y gobeithio gweinidogion fydd yn ddechrau’r diwedd i’r brydles, cyhoeddodd llywodraeth y DU ei drafft Fil Cyfunddaliad a Diwygio’r Brydles. Mae’r ddeddfwriaeth yn cynnwys gwaharddiad ar fflatiau prydles newydd, mesurau i wella’r ddeiliadaeth gyfunddaliad amgen, a chap o £250 y flwyddyn ar renti tir ar gyfer prydlesi presennol. Ar ôl cryn ddadlau o fewn y llywodraeth, byddai’r cap mewn grym am 40 mlynedd cyn troi’n rhent mewn enw yn unig. Fodd bynnag, i gyrraedd y llinell derfyn bydd yn rhaid i weinidogion glirio rhwystrau sylweddol yn San Steffan ac yn y llysoedd, gyda disgwyliad y ceir lobïo a heriau cyfreithiol gan fuddsoddwyr rhydd-ddaliad.

LLOEGR

Cartrefi newydd i fod yn ddi-garbon o 2028

Cyhoeddodd llywodraeth San Steffan Safon Cartrefi ac Adeiladau’r Dyfodol i wneud pympiau gwres, paneli solar a thechnoleg arbed ynni arall yn ofynnol ym mhob cartref newydd.

Bydd y safon, ar ôl oedi maith, mewn grym o fis Mawrth 2027 gyda chyfnod pontio ar gyfer cartrefi y dychreuwyd eu hadeiladu eisoes tan fis Mawrth 2028. Rhaid i bob cartref newydd fod yn barod am garbon sero a’r nod yw lleihau allyriadau carbon 75 y cant o lefelau 2013.

Daeth y cyhoeddiad bron 20 mlynedd wedi i lywodraeth Lafur flaenorol gyhoeddi dyddiad olaf o 2016 ar gyfer gwneud bob cartref newydd yn ddi-garbon. Cafodd y polisi ei lastwreiddio ac yna ei ollwng o dan lywodraethau’r Ceidwadwyr yn y 2010au.

Banc Tai Cenedlaethol yn dechrau gweithio

Agorodd Banc Tai Cenedlaethol Homes England ar gyfer busnes yn ffurfiol ar Ebrill 1af mewn ymgais i gyflymu’r broses o ddarparu cartrefi newydd a phrosiectau adfywio.

Gyda chefnogaeth llywodraeth y DU, bydd y Banc Tai Cenedlaethol yn gweithio gydag adeiladwyr tai, datblygwyr, buddsoddwyr a darparwyr cofrestredig i ddefnyddio hyd at £16 biliwn o ddyled, ecwiti a gwarantau. Bydd yn gweithio gyda Meiri hefyd trwy fodel rhanbarthol newydd Homes England i gryfhau cydweithio â phartneriaid ac arweinwyr.

YR ALBAN

Tai cymdeithasol yn gostwng o chwarter

Cwblhwyd 25 y cant yn llai o dai fforddiadwy yn yr Alban yn 2025, yn ôl ffigurau swyddogol.

Y 3,611 a gwblhawyd yw’r cyfanswm blynyddol isaf ers 2014 ac mae’n cymharu â 4,835 yn 2024. Cychwynnwyd ar 3,070, 15 y cant yn llai, y cyfanswm blynyddol isaf ers 1996.

Rhybuddiodd sector tai yr Alban fod Llywodraeth yr Alban ar y ffordd i dorri ei haddewid i adeiladu 110,000 o dai fforddiadwy erbyn 2032, gan amcangyfrif bod angen 15,700 o dai cymdeithasol y flwyddyn i ateb y galw am dai.

Medd cyfarwyddydd Shelter Scotland, Alison Watson: ‘Does gan yr un blaid gynllun credadwy i ddarparu’r tai sydd eu hangen ar yr Alban, sy’n golygu bod gwleidyddion o bob plaid yn cynllunio am fwy o ddigartrefedd. Mae angen arian newydd a dull newydd o fynd ati.’

GOGLEDD IWERDDON

Newid sut y cofrestrir landlordiaid

Lansiodd y gweinidog cymunedau, Gordon Lyons, ymgynghoriad ar gynigion i gryfhau’r Cynllun Cofrestru Landlordiaid.

Rhentir mwy na 130,000 o gartrefi yng Ngogledd Iwerddon ac ystyrir bod y sector yn chwarae rhan allweddol mewn rhoi mynediad i gartref fforddiadwy, cynaliadwy o ansawdd da i bawb.

Bu’n rhaid i landlordiaid preifat gofrestru ers 2014 ac mae newidiadau arfaethedig yn cynnwys casglu gwybodaeth am safonau eiddo wrth gofrestru a rhannu data cofrestru i helpu i orfodi diogelwch nwy a datblygu polisi tai.

LLYWODRAETH CYMRU

Cyhoeddi maniffestoau wrth i’r ymgyrch gychwyn

Mae’r prif bleidiau’n rhestru eu blaenoriaethau ar gyfer tai mewn maniffestoau a gyhoeddwyd cyn etholiad y Senedd ar Fai 7.

Gyda system etholiadol newydd ar waith a’r polau piniwn yn awgrymu ystod o ganlyniadau posibl, denodd y chwe phrif faniffesto sylw ar draws y sector.

Daeth y Senedd bresennol i ben ar Ebrill 9 a chyhoeddir y rhifyn hwn o WHQ yng nghanol yr ymgyrch etholiadol.

Senedd yn pasio deddfau digartrefedd a diogelwch adeiladau

Cafodd dau ddarn pwysig o ddeddfwriaeth sy’n effeithio ar dai Gydsyniad Brenhinol fis Ebrill ar ôl mynd drwy’r Senedd.

Mae Deddf Digartrefedd a Dyraniadau Tai Cymdeithasol (Cymru) yn diddymu profion ‘angen blaenoriaeth’ a ‘bwriadoldeb’ a all rwystro pobl rhag cael y gefnogaeth sydd ei hangen arnynt wrth wynebu digartrefedd. Mae hefyd yn canolbwyntio’n gryfach ar atal digartrefedd, ymrwymiad i sicrhau bod cefnogaeth a dyraniadau wedi’u teilwra i anghenion unigol pobl, a sicrhau cydweithio gwell ar draws sectorau.

Mynegodd Shelter Cymru ei werthfawrogiad o waith Llywodraeth Cymru ac Aelodau o’r Senedd o bob plaid wrth greu a mireinio’r Bil.

Dywedodd Ruth Power, prif weithredwr Shelter Cymru: ‘Heddiw, cymerodd Cymru gam pwysig tuag at gyflawni ein huchelgais gyffredin i wneud digartrefedd yn beth prin, byrhoedlog, nas ailadroddir.’

Dywedodd Matt Downie, prif weithredwr Crisis: ‘Mae heddiw’n dirnod i Gymru. Mae gan y Bil Digartrefedd a Dyrannu Tai Cymdeithasol newydd y potensial i newid bywydau’r miloedd o bobl ledled Cymru sy’n wynebu’r trawma sy’n dod o fyw heb le sefydlog i’w alw’n gartref.’

Mae Deddf Diogelwch Adeiladau (Cymru) — un o’r darnau mwyaf o ddeddfwriaeth a ystyriwyd gan y Senedd erioed — yn ehangach o ran cwmpas ac uchelgais na deddfwriaeth gyfatebol yn Lloegr, ac yn cyflawni ymrwymiad Llywodraeth Cymru i wneud diogelwch adeiladau yn egwyddor arweiniol ar gyfer sut y caiff cartrefi ac adeiladau eu rheoli ledled y wlad.

Ganed y ddeddfwriaeth o drychineb Tŵr Grenfell yn 2017, lle collodd 72 o bobl eu bywydau. Y nod yw sicrhau na all y methiannau a gyfrannodd at y drychineb honno byth gael eu hailadrodd yng Nghymru. Cafodd gymeradwyaeth Cam 4 y Senedd ym mis Mawrth.

Datgelu ymchwydd yn yr angen am dai

Mae angen llawer mwy o gartrefi newydd nag a dybiwyd yn flaenorol, yn ôl amcangyfrifon newydd o’r angen am dai a ryddhawyd fis Chwefror gan Lywodraeth Cymru.

Awgryma’r amcangyfrifon seiliedig ar 2025 bod angen 9,400 o unedau tai ychwanegol i ateb yr angen tai anniwall cyfredol gan deuluoedd digartref mewn llety dros-dro neu’n byw ar aelwydydd gorlawn a chêl.

Yn ogystal â hynny, y prif ragamcan ar gyfer angen newydd rhwng Gorffennaf 2025 a Mehefin 2030 yw 8,700 o unedau tai ychwanegol y flwyddyn.

Mae’r ffigur ar gyfer angen anniwall cyfredol yn gynnydd o 64 y cant ar amcangyfrifon blaenorol, yn seiliedig ar 2019. Mae hyn o ganlyniad i fwy o bobl yn mynd yn ddigartref ac yn byw mewn llety dros-dro, yn enwedig ers y agwedd ‘neb i’w adael allan’ tuag at ddigartrefedd a fabwysiadwyd yn ystod y pandemig.

Mae’r amcangyfrif canolog o 8,700 y flwyddyn ar gyfer angen y pum mlynedd nesaf yn gynnydd o 38 y cant ar yr amcangyfrif yn seiliedig ar 2019 o 6,300 y flwyddyn rhwng 2019 a 2024.

Mae hyn yn adlewyrchu‘r twf uwch a ragwelir mewn aelwydydd mewn rhagamcanion aelwydydd a gyhoeddwyd ddiwedd Tachwedd. Gyrwyd y rhagamcan yn bennaf gan gynnydd mewn aelwydydd un-person, yn enwedig ymhlith pobl hŷn.

Mae’r amcangyfrifon yn awgrymu, dros y pum mlynedd nesaf, y bydd 65 y cant o’r angen newydd sy’n codi (5,700 o gartrefi ychwanegol y flwyddyn) am dai marchnad a 35 y cant am dai fforddiadwy (3,000). Amcangyfrifir bod yr holl angen anniwall presennol ag angen tai fforddiadwy.

Ombwdsmon yn lansio ymchwiliadau lleithder a llwydni

Bydd yr Ombwdsmon Gwasanaeth Cyhoeddus yn bwrw ymlaen â dau ymchwiliad ei hun i sut mae landlordiaid cymdeithasol yn ymateb i gwynion am ddiffyg atgyweirio, â ffocws penodol ar leithder a llwydni sy’n effeithio ar denantiaid bregus.

Mae’r penderfyniad yn dilyn ymgynghoriad cyhoeddus ym mis Tachwedd 2025. Cafwyd ymatebion gan denantiaid, awdurdodau lleol, landlordiaid cymdeithasol, Llywodraeth Cymru a sefydliadau cynghori ac eiriolaeth trydydd-sector.

Nodai gwaith achos ac ymchwil yr ombwdsmon oedi ac ymatebion anghyson i gwynion am ddiffyg atgyweirio, lleithder a llwydni, yn aml yn nhai tenantiaid bregus. Yn 2024/25, roedd a wnelo ychydig dros 19 y cant o gwynion newydd â thai cymdeithasol, yn enwedig am ddiffyg atgyweirio, lleithder a llwydni.

Dengys tystiolaeth yr ymgynghoriad y gallai hyn effeithio’n anghymesur ar denantiaid bregus, yn gynnwys pobl anabl, pobl hŷn, teuluoedd â phlant, rhai ar incwm isel a phobl o gefndiroedd ethnig amrywiol. Disgrifiodd yr ymatebwyr y modd ddifrifol y gall diffyg atgyweirio, lleithder a llwydni heb eu datrys effeithio ar iechyd, lles ac annibyniaeth, a chytunwyd y byddai bwrw ymlaen â’r ymchwiliadau hyn o fudd i’r cyhoedd.

Meddai Michelle Morris, Ombwdsmon Gwasanaethau Cyhoeddus Cymru: ‘Er bod y sector yn newid, yn cynnwys dyfodiad Safon Ansawdd ddiweddaraf Tai Cymru i rym yn Ebrill 2026, mae’r dystiolaeth yn awgrymu bod problemau’n parhau. Bydd yr ymchwiliadau arfaethedig yn nodi gwelliannau mewn dysgu a chefnogi, tryloywder, ac atebolrwydd.’

Pwyllgor yn ffarwelio â galwad i uno ar dai cymdeithasol

Dywedodd pwyllgor trawsbleidiol yn y Senedd fod Llywodraeth Cymru ar y ffordd i gyrraedd ei tharged o 20,000 o gartrefi cymdeithasol ond bod y system dai yn dal mewn argyfwng.

Croesawodd y Pwyllgor Llywodraeth Leol a Thai y cynnydd hyd yn hyn ond dywedodd y clywodd hefyd dystiolaeth o arafwch wrth weithredu argymhellion y Tasglu Tai Fforddiadwy.

Mewn llythyr at yr ysgrifennydd tai Jayne Bryant, tynnodd cadeirydd y pwyllgor, John Griffiths, sylw at gasgliad eang o faterion a godwyd mewn sesiynau tystiolaeth a chyflwyniadau ysgrifenedig yn dilyn ei ymchwiliad i gyflenwad tai cymdeithasol yn 2024.

Dywedodd fod tystion wedi tanlinellu’r angen am ‘arweinyddiaeth gryfach gan Lywodraeth Cymru i sicrhau bod yr argyfwng tai yn cael ei ddeall fel blaenoriaeth drawsdoriadol a rennir’.

Roedd angen ‘cyfathrebu clir a chyson‘ i wneud y cyflenwad tai cymdeithasol yn brif flaenoriaeth ar ar draws pob maes llywodraeth.

Ac ychwanegodd fod y pwyllgor yn credu y byddai ‘dod â’r hawl i dai digonol i mewn i gyfraith Cymru yn helpu i sefydlu hyn fel blaenoriaeth hanfodol ar draws Llywodraeth Cymru’.

Parthed nod yr 20,000, roedd yr holl dystion yn hyderus y cyrhaeddid hi erbyn diwedd 2026 ond roedd rhai’n cwestiynu a oedd y cynnydd mewn darpariaeth yn ganlyniad i ‘lefel anghynaliadwy’ o fewnbwn adnoddau.

Ategodd y pwyllgor ei argymhelliad – a dderbyniwyd mewn egwyddor gan Lywodraeth Cymru – o darged y dylai tai cymdeithasol gyfrif am 20 y cant o’r stoc tai.

Ac fe alwodd eto am argymhelliad a wrthodwyd gan Lywodraeth Cymru y dylai sefydlu Corfforaeth Ddatblygu Genedlaethol i roi ffocws i’r rhaglen tai cymdeithasol a fforddiadwy.

Lansio astudiaeth cydgyfeirio rhent

Comisiynodd yr ysgrifennydd tai Jayne Bryant gwmni Savills i gynnal ymchwil i weld a fyddai polisi o gydgyfeirio rhent yn briodol i Gymru.

Mae’r penderfyniad yn dilyn y safon rhent a thâl gwasanaeth newydd ar gyfer 2026 i 2036 yn yr hydref ac eglurodd: ‘Mae rhanddeiliaid wedi tynnu sylw at y posibilrwydd y gallai cydgyfeirio rhent gynhyrchu incwm ychwanegol, ac mae rhai hefyd wedi dadlau y gallai cydgyfeirio rhent arwain at fwy o degwch i denantiaid.’

Fodd bynnag, gwn fod cydgyfeirio rhenti yn gymhleth yn ei hanfod. Mae goblygiadau sylweddol ar gyfer fforddiadwyedd, trefniadau cyllido presennol, a’r rhyngweithio â systemau fel Lwfans Tai Lleol a chymorth llesiant. Gan hynny, rhaid i unrhyw ystyriaeth o gydgyfeirio rhenti ddechrau gyda fforddiadwyedd, nid twf.’

Bydd yr ymchwil yn archwilio’r manteision posibl, y risg, a goblygiadau ymarferol unrhyw ddull o fynd ati yn y dyfodol, gan sicrhau ein bod yn deall y cymhlethdodau’n llawn cyn dod i unrhyw gasgliadau.

Meini prawf newydd ar gyfer cofrestru LCCiaid yng Nghymru

Cyhoeddodd Llywodraeth Cymru feini prawf ar gyfer cofrestru landlordiaid cymdeithasol newydd fis Mawrth mewn ymgais i sicrhau ‘proses ymgeisio dryloyw, deg a chyson’.

Nodir dau gam allweddol: yn gyntaf, rhaid i ymgeiswyr fodloni gofynion cymhwysedd statudol; yna cânt eu hasesu yn erbyn meini prawf ehangach, yn cynnwys llywodraethiant, trefniadau rheoli, a hyfywedd ariannol. Gall ymgeiswyr ddarparu gwybodaeth ychwanegol lle bo angen, a gwneir argymhelliad terfynol ar sail cyfanswm y dystiolaeth hon.

CYMRU

Mentrau ar y cyd ar gyfer Plasdŵr

Bydd gwaith ar gam diweddaraf Plasdŵr – Dinas Ardd nodedig Caerdydd – yn dechrau’r haf hwn o dan fenter ar y cyd rhwng Grŵp Edenstone a Grŵp Codi.

Derbyniodd y bartneriaeth ganiatâd materion neilltuedig fis Chwefror i adeiladu 184 o gartrefi ym Mhorth yr Awen ar Barsel 2C o Blasdŵr. Bydd y prosiect adfywio ehangach gwerth £2 biliwn yn darparu 7,000 o gartrefi ar draws safle 900-erw yng ngogledd-orllewin Caerdydd (gw. llun isod).

Bydd datblygiad £55 miliwn Edenstone a Codi yn helpu i ateb galw cryf am dai yn lleol, gan gefnogi cynlluniau twf hirdymor Caerdydd, trwy gynnig cartrefi mewn deiliadaethau cymysg. Mae’r cynllun a gymeradwywyd yn darparu 127 eiddo i’r farchnad agored a 57 o gartrefi fforddiadwy.

Wedi’i gynllunio fel cymdogaeth gyfoes, drefol, bydd Porth yr Awen yn cyfuno tai modern â mannau gwyrdd wedi’u hintegreiddio’n gelfydd a nodweddion tirlunio sy’n llunio amgylchedd cymunedol croesawgar.

Bydd blociau o fflatiau â ffenestri bae aml-lefel trawiadol, uchder-llawn y naill ochr a’r llall i’r fynedfa, yn edrych dros fannau gwyrdd tirluniedig a phyllau cronni yn creu ymdeimlad o gyrraedd.

Y tu hwnt i hyn, bydd gan y datblygiad gymysgedd o gartrefi deulawr a thri-llawr, yn cynnwys tai arddull-tref talcennog, pob un wedi’i gynllunio i adlewyrchu’r cymeriad pensaernïol a’r palet deunyddiau a bennwyd ar gyfer cymdogaeth ehangach Plasdŵr.

PRC yn cefnogi cwmni ynni

Cyhoeddodd cronfa arloesi Prifddinas Ranbarth Caerdydd fuddsoddiad yn Sero, y cwmni arloesi ynni o Gaerdydd.

Mae Sero yn helpu landlordiaid tai cymdeithasol a phartneriaid i ddarparu cartrefi ynni-effeithlon, sero-net ar raddfa, i ostwng biliau, gwella perfformiad ynni a lleihau allyriadau carbon. Mae’r cwmni’n cyfuno arbenigedd ôl-ffitio ac ynni â thechnoleg berchnogol sy’n cwmpasu cefnogaeth strategaeth i wasanaethau rheoli ynni parhaus.

Mae’r cwmni’n gweithio gyda chynghorau a darparwyr tai cymdeithasol i ddarparu gwasanaethau ynni ac ôl-ffitio mewn hyd at 2,500 o gartrefi, gyda phiblinell bellach o hyd at 10,000 o gartrefi dan gontract.

Mae’r buddsoddiad hwn, rhan o rownd ariannu ddiweddaraf Sero, yn rhan o ymrwymiad Partneriaeth Cyfalaf Buddsoddi Arloesi Gyfyngedig PRC i gefnogi mentrau graddadwy, wedi eu hysgogi gan genhadaeth sy’n ceisio atebion arloesol ag effaith amgylcheddol a chymdeithasol fesuradwy ar draws y rhanbarth.

Lansiwyd IIC ym mis Tachwedd 2022 gyda £50 miliwn cychwynnol o gyllid Llywodraeth y DU a Phrifddinas Ranbarth Caerdydd (PRC) i ddarparu cyfalaf hirdymor ar gyfer cyfleoedd twf arloesol a chynaliadwy ar draws deg awdurdod unedol PRC. Mae Capricorn Fund Managers (CFM) yn gwasanaethu fel Rheolwyr Cronfeydd Buddsoddi Amgen, gan oruchwylio rheoli portffolio a risg, gyda PwC yn cynghori ar ymchwil buddsoddi a ffynonellau, ar ran CFM.

Cynlluniau mawr ar gyfer safle rhielffordd segur

Caiff hen safle rheilffordd ym Mhen-y-bont ei drawsnewid yn 21 o gartrefi ynni-effeithlon ar rent cymdeithasol wrth i Cymoedd i’r Arfordir fwrw ymlaen â chynlluniau ar gyfer Ffordd Tyddyn Coch, Mynydd Cynffig.

Bydd y datblygiad yn adfywio safle tir llwyd a ddefnyddid gan y rheilffordd yn hanesyddol, gan wneud defnydd cynhyrchiol o dir diddefnydd tra’n cefnogi anghenion tai lleol. Caiff y cynllun ei gyflawni gyda chefnogaeth Cyngor Bwrdeistref Sirol Pen-y-bont ar Ogwr, a chwaraeodd ran allweddol wrth sicrhau cyllid trwy raglen Grant Tai Cymdeithasol Llywodraeth Cymru.

Mae’r safle mewn man da i gefnogi byw cynaliadwy, gyda chysylltiadau teithio llesol â’r Pîl, Gogledd Corneli a Mynydd Cynffig, yn ogystal ag ysgolion lleol, siopau a gorsaf reilffordd y Pîl.

Mae cynaliadwyedd yn ganolog i’r cynllun, gyda chartrefi’n cael eu hadeiladu gan ddefnyddio dulliau adeiladu modern (MMC) fframiau pren, ochr yn ochr â phympiau gwres ffynhonnell aer a systemau ffotofoltäig solar i leihau allyriadau carbon a gostwng costau ynni preswylwyr.

Mae gwaith galluogi, yn cynnwys adeiladu ffyrdd, eisoes ar y gweill, gyda thîm Cymoedd i’r Arfordir a’r contractwr P&P Builders yn y llun, a disgwylir cwblhau‘r cartrefi cyntaf erbyn diwedd 2027.

Cartrefi newydd ar y gweill yn y Coed Duon

Mae United Welsh wedi dechrau gweithio ar brosiect i ddarparu 58 o fflatiau ynni-effeithlon newydd ar rent cymdeithasol yng nghanol y Coed Duon.

Bydd datblygiad Lower Plas Court, sydd wedi’i leoli ar dir yn agos at Farchnad y Coed Duon ac yn ymyl cyfnewidfa gorsaf fysiau’r dref, yn floc tri-llawr a bloc arall pum-llawr o fflatiau. Bydd ei leoliad canolog yn gosod preswylwyr o fewn cyrraedd hawdd i siopau, gwasanaethau a chludiant cyhoeddus, gan gadw pobl mewn cysylltiad â chanol y dref.

Mae’r datblygiad yn cael ei gyflawni gan United Welsh mewn partneriaeth â Llywodraeth Cymru a Chyngor Bwrdeistref Sirol Caerffili.

Bydd pob cartref wedi’i adeiladu i lefelau uchel o effeithlonrwydd ynni, gyda strwythurau ffrâm bren y cartrefi yn dod o ffatri Celtic Off-Site yng Nghaerffili. Hwn bydd y bloc mwyaf o fflatiau a godwyd gan Celtic Offsite hyd yma.